((ابوذيات))

انــا مـشـابــك لـهـمـي (شابكتـلــة)
وبـقيت بلاية رحـمــة (شيب اكتلة)
يكبـر جـرحي يـوصل (شاب اكتلة)
خـايـف مــن شبـابـة يعـيــل بـيــــة
**********
انا لـدربــك ابـــــد لالا (مجـــــاني)
وانا انطيتك نبض كلبي (مجـــــاني)
انتظر طيفك يمــر بـيـة (مجـــــاني)
اجـانـي جفــاك كـام يواســي بيـــــة...
**********
انـا بـايـجــار كـاعـــــــد (جرحي مالك)
وتـرك حمـلـــة كلــيـبـي (جـر حمــالك)
اذا رايـــــــد طعــنـتـــي (جرحي مالك)
جســد واحـــد حمـــــل نفـس الاذيـــــة...
**********
صبح كالليل شخصك (وانتة بي سمار)
وتشـمك روحي وردة (وانتــة بســمـار)
يجــنك طــاب بيــتي (وانتـة بـس مـار)
منـــزل ون حســـرتـــة بمـغــربيـــــة...
**********
مثـل غيمة مطر روحـــي (بلـيــلة)
وعلى جروحي اون ليـلة (بلـيــلة)
طعـن بية وارد وانطـــق (بلـي له)
لان جــرحي وعـذابة استـلـذ بيـة...
**********
جروحـي ايتــام مـرن (مرضعنهم)
وعلى صدري يغـايب (مرضعنهم)
اذا رايـد تجـينـي (مر ضع ان هم)
لان بـــدون ونـك ماكـــو جـيـــة...
**********
سألـت الكـلـب بغيابـــك (يجيب ان)
ودموعي سموم لصوابي (يجـيـــبـن)
اهدهـن مـرة اعــاتـبهـن (يجـيـــبـن)
وتجــاوبـنـي الشمـاتــة بــرد اذيــة...
**********
اصيح احـات مــن بعدك (من احات)
وعليـك اليـــوم كـالبـهـة (مناحــات)
انـا طبـــع الغــدر بـيـــة (مناحـــت)
لان طبعــي جـبـل مـتـهـــزة حيـة...
**********
يـكـــل ويـاي شخـصــك دوم (كلات)
وصرت عزة نفس مهـيــوب (كاللات)
اريــد اكظـــي العـمـر ويـاك (كلات)
مثـل ماتــوجعـــك توجعــني ليـــــــة...
**********
عليــك انعـــى وانـوحن (ناعم اني)
ويريت ابقـى بجمــالـك (ناعم اني)
تــدري ليــش صايـــر (ناعم اني)
اثــر مــن النعــومــة البيـك بيــــة...
**********
بحضن طفلة ارج وانخــة (واناد ام)
وانا بحـبك اعـض اصبــع (ونـــادم)
تضــوك العسل بغـيـابـــي (وانا دم)
اضـــوك من الجــرح لجرحتة ليــة...
**********
انـا المـااخفـي سـرعـنـك (وامر قد...)
بنيـت الحسـرة فـي قلبي (ومر قد)
زليخة وصير ذل عشكك (ومر قد)
الطفل جـرحــك اظــن يشـهد علية ...
**********
انـا الـلـيـل بغـيــابـك نـشــف (ظل لام)
وجرح يسـأل جـرح ماطـاب؟(ظل؟ لام؟)
تنادي بروحي حسرة تصيح (ظـــلام)
لحـــــد مـاشـبـهــت بـيــك ال امـيـــة ...
**********
عطش هجرك لقائي يريد (مـامـا)
ومثل طفلة بظلام تصيح (مـامـا)
انـاديـك بلهـفـتـي تـكـول (مـامـا)
انا الصوجي فتحت حبلك بديـة ...

ابوذيات الشاعر احمد جناح الكاظمي
رجاءا عند النسخ اعطاء حقوق الشاعر

روووعه مبدع وربي

تايتنك الملك كتب:

روووعه مبدع وربي

تسلملي حبيبي نورت ياغالي